💎 நேர்மைக்கு கிடைத்த பாராட்டு! தொலைந்த பணப்பையை உரிமையாளரிடம் ஒப்படைத்த பொலிஸ் அதிகாரி

நுவரெலியா நகரில் தொலைந்து கிடந்த பணப்பை ஒன்றை கண்டெடுத்த காவல்துறை அதிகாரி, அதனை உரிய விசாரணைகளின் பின்னர் அதன் உண்மையான உரிமையாளரிடம் ஒப்படைத்த சம்பவம் பாராட்டைப் பெற்றுள்ளது.

நுவரெலியா தொலைத்தொடர்பு அலுவலகத்தின் முன்பாக தரையில் விழுந்து கிடந்த பணப்பையை, நுவரெலியா காவல்துறையின் போக்குவரத்துப் பிரிவு அதிகாரி ஆனந்தா (18915) இரவு ரோந்துப் பணியின்போது கண்டெடுத்துள்ளார்.

பணப்பையில் இருந்த தொலைபேசி எண்ணின் மூலம் அதன் உரிமையாளரை அடையாளம் கண்ட அதிகாரி, அவரை நுவரெலியா காவல்நிலையத்திற்கு வரவழைத்து, உரிய விசாரணைகளின் பின்னர் பணப்பையை ஒப்படைத்துள்ளார்.

அந்தப் பணப்பையில் ரூ.1,500 ரொக்கப் பணம், ரூ.15,000 மதிப்புள்ள இரத்தினக்கல், தேசிய அடையாள அட்டை மற்றும் சாரதி அனுமதிப் பத்திரம் உள்ளிட்டவை இருந்ததாகத் தெரிவிக்கப்படுகிறது.

தொலைந்த பணப்பையை அதன் உரிமையாளரிடம் நேர்மையுடன் மீள ஒப்படைத்த காவல்துறை அதிகாரியின் செயல் பொதுமக்களிடையே பாராட்டைப் பெற்றுள்ளது. 👮❤️👏